Sơnăm hŏk 2024-2025, dêh char Đắk Lắk đei 12/53 Hnam trưng THPT teh đak pơjing pơgơ̆r thi iŏk hŏk tro mât hŏk lăm 10, tŏk 9 hnam trưng pơting hăm sơnăm hŏk sơ̆. Mă đơ̆ng hnam trưng pơgơ̆r thi roi lơ ƀiơ̆ ră, mă lei kơsô̆ hŏk tro chih măt thi kŭm tôch lơ ‘năi. Lơ̆m noh, lơ hlŏh jĭ Hnam trưng PTTH chuyên Nguyễn Du đei hlŏh 1.000 hŏk tro chih măt thi, jô̆ păh lăp 3 ‘nu hŏk tro thi vă rơih iŏk 1. Hơdrô̆ môn nơ̆r Anh kơsô̆ pơjei băl lơ hlŏh ‘nŏh jĭ 6 ‘nu hŏk tro thi vă rơih iŏk 1 ‘nu.

‘Măng thi mât hŏk lăm 10 sơnăm ‘nâu, lơ̆m dêh char Đắk Lăk đei hlŏh 7.800 ‘nu hŏk tro năm thi tơ̆ 12 hnam trưng; pơgơ̆r lơ̆m ‘năr 7 păng 8/6. Kiơ̆ trong jang, tơdrong châm thi gô châm đang hiơ̆ hlŏh ‘nŏh lơ̆m ‘năr 14/6; roi tơbăt điêm tôm păng hơnăn hŏk tro đei iŏk mât hŏk lơ̆m ‘năr 21/6.