‘Mi kial đak hơbông, teh hơlih pơm 3 ‘nu bơngai lôch păng hiong tơ̆ xah Mường Lang, lơ̆m noh đei 1 ‘nu hơ-ioh 5 sơnăm. Atŭm hăm noh, ‘mi tih hlôi pơrăm hloh 40 ha ƀa pơyan kơ kon pơlei; 6 tŏ hnam ƀơm hơlih, lơ̆m noh, 3 unh hnam athei jăk tơ̆ nai, 3 unh hnam tŏk bŏk oei hơmet răm.

Dang ei, apŭng Phù Yên tŏk bŏk pơgơ̆r khul jang kơpal chơ chă bơngai hiong, hơvơn kon pơlei, kăn ƀô̆, bơngai jang kơ anih jang Vei lăng kon pơlei apŭng atŭm hăm xah chă kăt ƀa tơ̆ hơgăt teh ƀơm răm. Thư̆ trương Nguyễn Hoàng Hiệp hmach bơnê kơ dôm tơdrong hơdrin đơ̆ng apŭng Phù Yên lơ̆m tơdrong hơmet ‘mi kial pơrăm, chơ chă tơgŭm dŏng bơngai ƀơm sar bar. Atŭm hăm noh, pơkăl dêh char Sơn La păng apŭng Phù Yên pơtoi hơlen hơmet tơdrong răm, tenh kuăng sơđơ̆ng tơdrong hơrih păng pơm jang ăn kon pơlei.