Pơm lêh sơng đei pơgơ̆r tơ̆ Hnam Kuôk hô̆i tơ̆ groi Capital kơ Hơnih tơm Canberra, teh đak Australia, kiơ̆ trong pơgơ̆r kăl ‘măn ăn bơngai chĕp kơ̆l Khul kơdră Teh đak năm ngôi tơ̆ Australia.

Lơ̆m jơ ‘năr ‘lơ̆ng rŏ tơgoăt tơgoăl, Thủ tướng Anthony Albanese hơvơn Thủ tướng Phạm Minh Chính tŏk tơ̆ hơnih kăl ƀlep lơ̆m jơ ‘năr prăh 19 ‘măng ƀrơ̆m kơnong tơ̆ groi Capital. Hla kơ Việt Nam đei hiot hơtol kơkuh sơng Thủ tướng Phạm Minh Chính păng hơkăn ƀok hăm khul kơdră kơpal Việt Nam.

Lăp đơ̆ng rŏng pơm lêh sơng, ƀar Thủ tướng pơma đam. Thủ tướng Australia hăm Thủ tướng Phạm Minh Chính vang năm Pơm lêh pơjao dih băl hla bơar pơkăp jang hơdoi; adoi tơƀơ̆p pơma dơnuh hăm khul chih kơtơ̆ng ang tơroi tơbăt pơtôch pơma đam, lơ̆m au tơbăt hơdăh pơjing Tơgoăt tơgoăl Jang hơdoi gĭt kăl tôm tong Việt Nam – Australia.

Lơ̆m 2 năr vang Hop akŏm Kơpal kăp gĭt tơbăt 50 sơnăm tơbôl ASEAN-Australia, Thủ tướng teh đak bơ̆n Phạm Minh Chính hlôi ‘măn jơ tơjrơ̆m hăm tôm Kơdră kơpal kơ dôm teh đak ASEAN, Australia, New Zealand păng Ƀok Tổng Thư kĭ ASEAN.  

Lơ̆m dôm ‘măng tơjrơ̆m, Thủ tướng teh đak bơ̆n hmach bơnê kơ tơdrong jang hadoi, tơgŭm, tơroi gah tơdrong hlôh vao kơ dôm teh đak lơ̆m hơmet hơtŏk mŭk drăm; tơbang tơdrong hơpơi ‘meh hơtŏk jang hadoi lơ̆m dôm tơdrong jang kăp gĭt kơ ASEAN păng tơdrong mă Việt Nam jang tơbôl hăm dôm teh đak, mă kăl noh gah chĭnh trĭ - tơbôl, mŭk drăm – tĕch pơdro – asong jang, vei sơđơ̆ng tơpôl teh đak, pơtho pơhrăm, khua hŏk kŏng ngê̆...; pơtoi jang hadoi kơjăp vă pơjing minh ASEAN tơguăt tơguăl, drơ̆ng minh, hơtŏk jang hadoi lơ̆m jơnŭm jang, chĕp vei sơnong jang tơm lơ̆m sek tơlang dôm tơdrong tơsŭl tơsăl gah sơđơ̆ng tơpôl, tơdrong jang tơ̆ tơring. Ƀơ̆t ‘măng âu, Thủ tướng teh đak bơ̆n hlôi hơvơn đe kơdră kơpal kơ dôm teh đak pơtruh đe Ƀô̆ trương tang măt vang năm Hop akŏm Khei năr anô̆ anăp kơnh ASEAN kơchĕng gô vă pơgơ̆r tơ̆ Hà Nội ah năr 23/4/2024.