Tơdrong vă jang ou đei hơtăih 519km, găn hloh 9 dêh char, hăm akŏp kon jên tơmơ̆t jang 22.000 ti hlak jên, đei tơlĕch jang đơ̆ng blŭng sơnăm ou. Truh dang ei hlôi jang keh đang iŏk tơvih teh, ming man đang jrăng, jang đang tĕch răt kmăi kmŏk, tơlei ăn hơnih ming man …Rim tơdrong jang tim mă keh đang găh lơ̆m ƀar dêh char Nghệ An, Hà Tĩnh; tŏk bŏk iung jang ming man vă keh đang, pơtruh ŭnh hơyuh hơdrol năr 19/8/2024. Thủ tướng Teh đak Phạm Minh Chính pơma hơdăh, trong hơlei ŭnh hơyuh 500kV jăl trong mă 3 jĭ tôch gĭt kăl, pơm hơtŏk pơtruh ŭnh hơyuh ăn tơring găh Tu, tơgŭm pơtruh ŭnh hơyuh sơđơ̆ng ăn jang sa, iŏk yua kơ kon pơlei, hơnih mơdro sa. Thủ tướng Teh đak pơjao tơdrong jang hơdăh ăn rim hơnih tơm, hơnih bơ̆ jang, kơdră dêh char, hơnih iŏk jang; adoi pơrô̆ athei rim khul iung jang hơdoi kơjăp, tơgŭm djru dih băl jang keh đang trong tơlĕch jang.