Tơdrong jang đang tơmơ̆t trong tơley ŭnh điên 500 kv mạch 3 Phố Nối - Quảng Trạch lơ̆m vei lăng đei tơdrong ‘lơ̆ng gĭt kăl. Thủ tướng teh đak athei dôm anih tơm, anih jang, tơring, kang ƀô̆, ki sư, kŏng nhân, bơngai jang hơdrin hloh dơ̆ng, pơtrŭt tơdrong jang vei sơđơ̆ng mă hrĕnh, hơtŏk jang ‘lơ̆ng, vei sơđơ̆ng rơgoh cham char; vei sơđơ̆ng jơhngơ̆m pran bơ̆jang dơ̆ng păng tơdrong đei yua đơ̆ng dôm tơ ‘ngla ƀơm truh; vei sơđơ̆ng tơdrong pơm tơm, đei yua trŏ ƀlep đơ̆ng kon pơlei hơnih trong tơley chô̆ klĕch.

Pơjao kơ Phŏ Thủ tướng Trần Hồng Hà pơgơ̆r păng pơjao rim tơdrong jang hơdăh ăn kơ rim anih tơm, anih jang, tơring, Thủ tướng Phạm Minh Chính athei pơjing dơ̆ng trong tơley ƀlep  tơdrong păng pơgơ̆r răp hơlen lăng, jang kiơ̆ rim năr, rim giĕng găh tơdrong, vei sơđơ̆ng chô̆ ŭnh điên, tơmơ̆t yua trong tơley ŭnh điên 500 kv mạch 3 Phố Nối - Quảng Trạch hơdrol kơ ‘năr 30/6.