Đơ̆ng blŭng sơnăm 2023 truh dang ei lơ̆m teh đak đei ƀôh vă jê̆ 3 rơbâu ‘măng ŭnh sa păng sar bar ŭnh sa, pơm lôch 134 ‘nu, rơka 101 ‘nu, găh mŭk tơmam jô̆ pơhlom tam mă tôm jing jên vă jê̆ 230 ti hlak jên. Pơtôch hop akŏm, Thủ tướng Phạm Minh Chính lăng ‘lơ̆ng tơdrong hơdrin, jơnei mă dôm anih tơm, anih jang, tơring, dôm khŭl lĭnh kơpal hlôi iŏk đei lơ̆m tơdrong jang tang găn ŭnh sa pĭt ŭnh sa păng dŏng sar bar, dŏng tơgŭm, hlôi tơgop pơm hơnih sơđơ̆ng hiôk ăn tơdrong arih sa. Hơdai hăm ‘noh, Thủ tướng athei kăl kơ tơpăt lăng iŏk tơdrong jang tang găn ŭnh sa pĭt ŭnh sa păng dŏng sar bar, dŏng tơgŭm, oei lơ ưh kơ ‘lơ̆ng kăl kơ tơ tĕnh hơmet pơ ‘lơ̆ng.

Thủ tướng tơƀôh rơđăh, tơdrong chĕp kơ̆l, pơgơ̆r, bơ̆jang kiơ̆ tơdrong jang tang găn ŭnh sa pĭt ŭnh sa păng dŏng sar bar, dŏng tơgŭm đei hơnih tam mă đei yua ‘lơ̆ng. Thủ tướng athei dôm Kơdră tơm, kơdră anih jang hơtŏ Anih tơm, Kơdră anih vei lăng kon pơlei dôm dêh char, pơlei tơm tơpăt lăng kiơ̆ tơdrong hlôh vao, hơmet ming lơ̆m chĕp kơ̆l, pơgơ̆r tơdrong jang tang găn ŭnh sa pĭt ŭnh sa păng dŏng sar bar, dŏng tơgŭm.