Hla ar tơroi rơđăh: Kiơ̆ tơroi tơbăt hrĕnh đơ̆ng Anih vei lăng sơđơ̆ng trong nơnăm teh đak, lơ̆m kơplăh 02 jơ 10 pơnĭt ‘năr 31 khei 10 sơnăm 2023, tơ̆ km70+800 Trong gre tih 1A găh krang Rừng Cấm, apŭng Hữu Lũng, dêh char Lạng Sơn hlôi đei ƀôh gre tơ̆m preh băl tôch kơtang đơ̆ng gre ô tô chơ tơmoi 16 hơnih  đei kơƀang kơ sô̆ vei lăng 14B-03657 preh băl hăm gre sơ mi rơ moóc păng gre container kơdâu kiơ̆ trong hơdrơ̆k băl; hiong răm pơm ăn 05 ‘nu lôch păng lơ bơngai rơka, 3 tong gre ô tô hư răm kơtang.

Lăp iŏk đei roi tơbăt ‘măng gre treh băl, Thủ tướng teh đak hlôi athei gơih nơ̆r apĭnh jet gia, vang sơ ‘ngon truh ŭnh hnam dôm bơngai lôch, pơlung, apĭnh jet gia dôm bơngai rơka lơ̆m ‘măng gre preh băl; hơdai hăm klăih song dôm bơngai tang măt Anih tơm vei lăng Kŏng an, Anih tơm vei lăng trong nơnăm, gre kơdâu kơtă truh tơ̆ hơnih gre preh băl vă jang hơdai hăm Anih vei lăng kon pơlei dêh char Lạng Sơn păng dôm anih jang đei ƀơm truh athei hơmet pơ ‘lơ̆ng hiong răm păng apĭnh jet gia dôm bơngai răm lơ̆m ‘măng gre preh băl; pơgơ̆r năm lăng, năm ngôi, tơgŭm tơtom, pơlung ŭnh hnam dôm bơngai lôch păng dôm bơngai rơka lơ̆m ‘măng gre tơ̆m preh băl.