Tơdrong jang man cham gre păr apŭng plenh teh Long Thành (Đồng Nai) jăl 1 đei jên jang hlŏh 109 rơbâu ti, tơchĕng adrol gô man đang lơ̆m sơnăm 2026. Bơ̆jang kiơ̆ nơ̆r pơtho đơ̆ng Thủ tướng, khei ‘năr âu ki, Anih tơm vei lăng ming man păng dôm bơngai tơmât jên jang tơlĕch lơ trong jang vă tơjur ƀiơ̆ khei ‘năr ming man, kiơ̆ kơ ‘nŏh gô jang đang tơdrong jang ‘nâu lơ̆m sơnăm ‘nâu hloi.

Bơ̆jang hăm dôm anih tơm, anih jang kơpal, tơring tơrang, tơ ‘ngla tơmât jên jang, anih ming man, Thủ tướng Phạm Minh Chính pơma hơdăh, Tơdrong jang man Cham gre păr Long Thành tôch gĭt kăl. Đơ̆ng rŏng lơ tơdrong adrin tôch ai, um rup cham gre păr ‘nao ‘lơ̆ng rŏ hlôi đei ƀôh bơih. Athei adrin truh đĭ ‘năr 31/12/2025 ‘nŏh jang đang tơdrong jang ‘nâu vă sơng gre păr truh mă blŭng, Thủ tướng teh đak pơma tơƀôh dôm tơdrong jang kăl nai athei bơ̆ jang mă ‘lơ̆ng ‘năi; dôm anih tơm, anih jang kơpal, tơring tơrang, bơngai iŏk jang athei adrin tôch ai vă gơ̆h bơ̆ jang hrĕnh, kơjăp ‘lơ̆ng.