Kiơ̆ tơroi tơbăt đơ̆ng Anih tơm vei lăng găh Tơdrong kơtơ̆ng ang păng Tơroi tơbăt, tơplih kơsô̆ đei tŭn pran kiơ̆ trong đĭ đăng lơ̆m kon pơlei, tôm tơdrong, đei iŏk yua ‘lơ̆ng, tơgop ‘lơ̆ng lơ̆m tơdrong hơtŏk tơiung mŭk drăm tơpôl teh đak. Mŭk drăm kơsô̆, tơpôl kơsô̆ hơnơ̆ng hơtŏk tơiung pran kơtang, tơmam kơsô̆ đơ̆ng anih mơdro sa Việt Nam hơnơ̆ng hơtŏk tơiung păng tĕch tơlĕch năm jơ̆p apŭng plĕnh teh.

Pơma pơtôch hop akŏm, Thủ tướng Phạm Minh Chính chih iŏk, pôk pơ ư păng lăng ‘lơ̆ng dôm tơdrong hơdrin păng jơnei iŏk đei đơ̆ng dôm anih tơm, anih jang, tơring. Thủ tướng pơma hơdăh, dang ei ưh kơ pơlong lăng dơ̆ng bơih mă athei tŏk mă hrĕnh, mă pran kŭm hăm jơhngơ̆m iung jang pran kơtang. Tŭn pran drơ̆ng 1 nơ̆r hlôh vao păng bơ̆jang đơ̆ng bơngai chĕp kơ̆l lơ̆m tơplih kơsô̆, hơtŏk tơdrong iung jang, pơm jŭk yŭk trong hơlâu; tŭn pran hơmet pơ ‘lơ̆ng trong jang tơgŭm, vă pơtrŭt tơplih kơsô̆, lăp hăm tơdrong joăt apŭng plĕnh teh; pơtrŭt hơtŏk tơiung mŭk drăm, tơpôl kơsô̆, kon pơlei kơsô̆.