Thủ tướng Phạm Minh Chính gơih nơ̆r apĭnh jet gia, vang sơ ‘ngon truh hăm ŭnh hnam bơngai răm. Lơ̆m dôm năr âu ki, tơ̆ 1,2 tơring groi kông păh Tu păng tơring Tây Nguyên hlôi đei ƀôh ‘mi tih, pơm ăn teh hơlih, đak lŏk jroh. Pơ gê hrôih 29/6 hlôi đei ƀôh teh hơlih tơ̆ pơlei tơm Đà Lạt, dêh char Lâm Đồng pơm ăn 2 ‘nu đei teh kơ lơ̆p, 1,2 ‘nu rơka, hnam oei kon pơlei đei hư răm.

Vă tơtĕnh hơmet pơ ‘lơ̆ng hiong răm teh hơlih tơ roi kơpal păng kơ chăng vei sơđơ̆ng ăn kon pơlei păng anih jang kăl lơ̆m pơyan ‘mi, Thủ tướng athei dôm Kơdră Anih tơm vei lăng găh choh jang sa păng hơtŏk tơiung tơring tơrang, Tơmam drăm păng Cham char, Ming man, Pơtho pơhrăm, Trong nơnăm gre kơdâu, Kơmăy kơmŏk mơdro sa, Khŭl linh, Kơdră Anih vei lăng kon pơlei dôm dêh char, pơlei tơm găh trung ương, Anih pơgơ̆r jang teh đak găh tang găn ‘mi kial pơrăm păng Anih jang teh đak tơjră hăm tơdrong sar bar, ‘mi kial pơ răm păng tơchă dŏng sar bar akŏm pơgơ̆r, kơchăng tơlĕch jang tang găn, tơ jur ƀiơ̆ hiong răm yua đơ̆ng ‘mi kial pơrăm.