Lơ̆m pơgê năr 1/12, Thủ tướng Phạm Minh Chính sơng pơma dơnuh hăm Kơdră chĕp pơgơ̆r Hơnih bơ̆ jang vei lăng Khul jang kơpal UAE păng Kơdră chĕp pơgơ̆r Hơnih tơm jang Muk drăm UAE Abdulla Bin Touq Al-Marri. Đơ̆ng rŏng ‘noh, Thủ tướng vang pơm lêh pơgơ̆r blŭng a Hop akŏm kơdră kơpal iung jang vei lăng tŏ ‘mi kial apŭng plĕnh teh.

Kơsơ̆ năr ‘noh mơ̆n, Thủ tướng vang chĕp pơgơ̆r tơdrong pơgơ̆r “Hơvơn kon jên jang kiơ̆ nơ̆r pơkăp kơ Việt Nam găh tơplih tŏ ‘mi kial” atŭm hăm Kơdră chĕp pơgơ̆r plei teh Standard Chartered Bank. Mă kăl, Thủ tướng  đei nơ̆r pơma tơ̆ ‘măng pơgơ̆r “Hơvơn kon jên jang kiơ̆ nơ̆r pơkăp kơ Việt Nam găh tơplih tŏ ‘mi kial”; adoi vang năm păng iung pơma tơ̆ Pơm lêh tơbăt Trong pơpơ̆r jang hơvơn khul jang (RMP) tơlĕch jang JETP. ‘Ngoăih kơ ‘noh, Thủ tướng gô pơgơ̆r tơƀơ̆p pơma dơnuh dih băl hăm rim kơdră, nhen tơƀơ̆p Thủ tướng Anh, Kơdră chĕp pơgơ̆r EC păng Ƀok kơdră tơm Hungary.