Tơdrong jang găh jăl Cần Thơ - Hậu Giang păng jăl Hậu Giang - Cà Mau găh Tơdrong jang pơm trong gre kơdâu hrĕnh Bắc - Nam găh Hơlĕch đơ̆ng 2021 - 2025, hăm kơsô̆ jên jang hlŏh 10.370 ti. Tơ̆ anih oei bơ̆ jang ming man, Thủ tướng Phạm Minh Chính hơpăh tơmam pơlung ăn dôm anih bơ̆ jang, atŭm hăm ‘nŏh athei khul kơdră pơgơ̆r tơring athei krao hơvơn đĭ đăng anih jang chinh trĭ, kon pơlei vang bơ̆ jang, vang pơjing đei tơdrong pơjei băl bơ̆ jang ‘lơ̆ng hơiă.

Atŭm hăm ‘nŏh, Thủ tướng athei anih jang jang kiơ̆ khoa hŏk kơmăy kơmŏk ‘nao, hăm kơmăy ki thuơ̆t rơgei hlŏh vă jăh jang đang hrôih, mă lei athei kơjăp ‘lơ̆ng, atŭm hăm ‘nŏh tang găn xa pơjĭp, pơm glăi, pơhuach kư̆ kă. Hăm kon pơlei tơ̆ tơring đei tơdrong jang, Thủ tướng athei rim anih chĕp kơ̆l đảng, khul kơdră pơgơ̆r tơrek truh, pơm ‘lơ̆ng vă kon pơlei tŏk oei tơ̆ plei hle đei tơdrong arih xa ‘lơ̆ng, hiôk hian ƀiơ̆, vei lăng ‘lơ̆ng tơdrong arih xa, jang xa ăn kon pơlei, đơ̆ng noh gơ̆h pơjing đei tơdrong đei yoa atŭm đơ̆ng trong gre kơdâu hrĕnh.