Đunh kơ âu 30 sơnăm, dôm tong gre păr kơ Anih jang gah gre păr teh đak Việt Nam hlôi păr tơpăt đơ̆ng pơlei tơm Hồ Chí Minh truh Anih tơm Seoul, Hàn Quốc. Truh dang ei, anih jang oei iŏk yua 6 trong păr tơpăt noh Hà Nội, pơlei tơm Hồ Chí Minh - Seoul; Hà Nội, pơlei tơm Hồ Chí Minh - Busan; Đà Nẵng - Seoul păng Cam Ranh - Seoul, hăm pơkăp rim giĕng đei truh 112 ‘măng păr.

Pơma ah hop akŏm, Thủ tướng Phạm Minh Chính ră hơdah đơ̆ng rŏng hloh 30 sơnăm iung jang tơbôl Việt Nam – Hàn Quốc hơtŏk ‘lơ̆ng rŏ, jing Teh đak jang hadoi tôm tơdrong hăm dih băl, hăm 5 anih hơdah noh lui ngeh gah chĭnh trĭ, tơguăt kon bơngai, jang hadoi gah mŭk drăm, vă le lăi gah joh ayŏ, atŭm đei hơpơi ‘meh tơ-iung pơjing teh đak pran jơnap, kon pơlei phĭ tơtŏ dơnŏ ‘lơ̆ng.