Pơma tơ̆ jơ bơ̆ jang, Thủ tướng Phạm Minh Chính pơma hơdăh, Hla ar tơroi ‘nŏh jĭ tơmam vă roi tơbăt găh đon tơchĕng đơ̆ng Đảng, lơ̆m nŏh, Khul chih hla ar tơroi Việt Nam đei hơnăp jang gĭt kăl ‘nŏh tơguăt ƀơ̆r đon, mât 1 jơhngâm, hơtŏk đon jang chinh trĭ, pơtho pơhrăm ming mă ‘lơ̆ng tơdrong jang, pơtâp hơmet jơhngâm đon ăn dôm bơngai chih hla ar tơroi. Thủ tướng Phạm Minh Chính pơtruh nơ̆r ‘lơ̆ng hơiă hlŏh păng tơchĕng ‘lơ̆ng, pôk pơ ư dôm tơdrong jơnei, tơdrong tơgop gĭt kăl đơ̆ng Khul chih hla ar tơroi Việt Nam păng dôm bơngai chih hla ar tơroi lơ̆m tĕh đak.

Thủ tướng athei Khul chih hla ar tơroi Việt Nam kơchăng hlŏh dơ̆ng lơ̆m tơdrong tơƀôh trong ăn khul chih hla ar tơroi hơtŏk tơdrong tơchĕng hơlen trong jang, tơdrong tơgŭm păng adrin vang bơ̆ jang roi tơbăt dôm tơdrong tơgŭm; tưk tơiung tơdrong pơcheh ‘nao rơgei, tơgop pơm hơtŏk tơdrong đei yoa đơ̆ng roi tơbăt, tơƀôh trong ăn tơpôl; khŏm pơjing khul bơngai chih hla ar tơroi gơ̆h hơgei; hơmet ming jơhngâm đon ưh tơpăt mưh bơ̆ jang, hơtŏk tơdrong tơpăt ‘lơ̆ng mưh chih hla ar tơroi. Hla ar tơroi athei năm hơdrol chă ƀôh, pôk pơ ư dôm bơngai rơgei, tơdrong jang ‘lơ̆ng, bơngai đei jơhngâm đon ‘lơ̆ng, iŏk tơdrong ‘lơ̆ng vă găn pơđĭ tơdrong kơnê̆, pơjing jơhngâm hưch hanh, pôk pơ ư bơngai ‘lơ̆ng lơ̆m tơpôl. Jang ‘lơ̆ng tơdrong dăr lăng, tơblang tơƀôh; roi tơbăt mă trŏ, tơtom, rơđăh rơđong.