Kiơ̆ tơroi tơbăt, sơnăm 2023, Grŭp jang Ŭnh điên Việt Nam hlôi hơdrin jang đang dôm tơdrong hơgăt hơbnăp jang tơlĕch ăn lơ̆m noh tơdrong pơm tơlĕch păng pơtruh ŭnh điên hlôi pơtruh tôm ŭnh điên ăn mŭk drăm, lơ̆m noh hlôi đei ƀôh tơdrong ưh kơ măh anih pơtruh hơtuch khei 5, blŭng khei 6 păng athei bơ̆jang pơm tơ jur tŏ sĕt tơ̆ tơring găh Tu. Ŭnh điên pơm tơlĕch lơ̆m anih jang đei hloh 280 ti kWh, tŏk hloh 4,5% pơting hăm sơnăm 2022. Tang măt Khŭl kơdră teh đak, Thủ tướng Phạm Minh Chính bơnê, chih iŏk, pôk pơ ư tơdrong hơdrin, jơnei mă Grŭp jang ŭnh điên Việt Nam hlôi iŏk đei tơgop gĭt kăl lơ̆m jơnei aŭm kơ lơ̆m teh đak lơ̆m sơnăm 2023.

Thủ tướng athei EVN hơdrin jang đang dôm tơdrong hơgăt hơnăp jang đei pơjao sơnăm 2024, vei sơđơ̆ng pơtrŭh tôm ŭnh điên ăn hơtŏk tơiung mŭk drăm tơpôl kơ teh đak. Tơdrong tơm tih hloh ‘noh jĭ ưh kơ gơh lê̆ ưh kơ măh ŭnh điên ăn pơm tơlĕch tĕch mơdro păng răt yua lơ̆m dôm tơdrong kiơ; tơdrong tơm tih mă 2 ‘noh jĭ athei vei lăng kơjă kiơ̆ anih tĕch mơdro, mă lei trong jang tơgŭm hăm vei sơđơ̆ng tơdrong arih sa tơpôl.