Lơ̆m 7 khei blŭng sơnăm 2023, tơdrong mŭk drăm tơpôl dêh char Bắc Ninh iŏk đei lơ jơnei, pơm tơlĕch đei ƀôh tơiung ming, akŏp kơ sô̆ tĕch le tơmam păng pơvih pơvăn đei vă jê̆ 54 rơbâu ti hlak jên, jên tơmơ̆t jang kơtă teh đak đe chih măt ‘nai iŏk đei  770 triệu USD, tŏk vă jê̆ 4,6 ‘măng pơtêng hăm khei ‘nâu sơnăm sơ̆. Thủ tướng Phạm Minh Chính pôk pơ ư tơdrong hơdrin păng jơnei iŏk đei đơ̆ng Đảng bộ, khŭl kơdră, lĭnh păng kon pơlei dêh char Bắc Ninh, tơgop pơm gĭt kăl lơ̆m jơnei atŭm kơ lơ̆m teh đak.

Tơ̆ hơnăp kơnh Thủ tướng athei, dêh char Bắc Ninh pơtrŭt tơplih ‘nao pơcheh hơgei, tơiung pơjing tơdrong jang sa, hơtŏk tơiung anih mơdro sa. Pơtrŭt tơdrong jang tĕch răt hăm teh đak đe; lăng kăl hơtŏk tơiung choh jang sa tơmơ̆t yua kơmăy kơmŏk ‘nao, tơplih đon tơchĕng choh jang sa jing mŭk drăm tơmam đơ̆ng choh jang sa, hơtŏk tơiung anih tĕch mơdro tơmam đơ̆ng choh jang sa đei lơ̆m păng ‘ngoăih teh đak. Dêh char kăl kơ hơtŏk pran tơdrong joăt joe jơhnơr arih, joh ayŏ, tơ goăt pôm nơ̆r ƀơ̆r đon, hơdrin yak pran kơtang hăm jơhngơ̆m pran đơ̆ng kơdih, ưh kơ răp gô, pơmơ̆ng, tơgop pơjing mŭk drăm hiôk hian, pơm tơ ‘ngla kơdih.