Kiơ̆ tơroi tơbăt, 6 khei blŭng sơnăm 2023 tơdrong jơnei hơtŏk tơiung mŭk drăm tơpôl kơ dêh char iŏk đei 1,2 jơnei gĭtt kăl, akŏm tơmam lơ̆m tơring tŏk 3,43%. Hơmet ming mŭk drăm tơplih ‘lơ̆ng. Pơtôch jơ bơ̆jang, Thủ tướng Phạm Minh Chính pơ ư tơdrong hơdrin păng lăng ‘lơ̆ng jơnei mă Đảng bộ, khŭl kơdră păng kon pơlei Long An iŏk đei lơ̆m bơ̆jang kiơ̆ hơnăp jang hơtŏk tơiung mŭk drăm tơpôl khei ‘năr âu ki.

Găh trong vă jang hơtŏk tơiung kơ Long An Thủ tướng tơƀôh hơdăh, Long An kăl kơ bơ̆jang kiơ̆ jơnei tơdrong jang kĭt kăl vă pơm tơdrong hơtŏk tơiung ‘lơ̆ng, kơjăp, hơtŏk anih dơ̆ng Long An kiơ̆ lơ̆m dôm tơdrong tơm ‘noh jĭ Choh jang sa bri brăh ‘noh tơm; Kơmăy kơmŏk rơgoh, kơmăy kơmŏk ‘nao, pơm tơlĕch, ŭnh hơyuh ‘noh ‘lơ̆ng; pơvih pơvăn ‘noh hơtŏk ăn, hơnhăk Long An jing hơnih chơ chuĕn tơmam lơ̆m tơring. Hơdai hăm iŏk jang đei yua dôm tơmam ‘lơ̆ng, đei yua, tơ klep đei yua hăm anih jang mŭk drăm pơlei tơm  HCM păng tơring hơlĕch pơbăh; iŏk jang ‘lơ̆ng đei yua tơm tơklep hăm Campuchia.