Kiơ̆ kơ Thủ tướng, jang hơdai mŭk drăm, mơdro sa, tơmơ̆t jên jang, khoa hŏk kơmăy kơmŏk, tơplih ‘nao pơcheh... jĭ dôm tơdrong tơm gĭt kăl vă pơtrŭt pơvei 2 teh đak lơ̆m tơdrong tơplih ‘nao tôm tơdrong păng đei yua hloh nhen Tổng Bí thư Nguyễn Phú Trọng păng Kơdră tơm teh đak Mi Joe Biden ‘meh vă.

Thủ tướng Phạm Minh Chính ‘meh vă Mi pơma atŭm păng dôm anih mơdro sa Mi pơma hơdrô̆ kŭm hăm Việt Nam bơ̆jang kiơ̆ tơdrong hơgăt kơpal; hơdai hăm ‘noh vang tơjră hăm dôm long nol đei jơ̆p plei teh, đĭ đăng kon pơlei, nhen: Tơplih tŏ ‘mi kial, kơ sô̆ kon pơlei kră lơ, jĭ hơbuh, ưh pă gan đei lơ tơmam... lơ̆m khei ‘năr Việt Nam oei lơ mơmat tat yua đơ̆ng 1 khei ‘năr đunh đei tơblăh vang phă pơrăm, jĭ teh đak tŏk bŏk tŏk pơdrŏng, mŭk drăm tŏk bŏk tơplih, tơdrong jang mŭk drăm oei tam mă gan ‘lơ̆ng, tơdrong tơ jră pŭ hăm dôm tơdrong ưh kơ ‘lơ̆ng đơ̆ng găh ‘ngoăih ưh tam mă gan kĕ. Pơma pơtôch jơ bơ̆jang, Thủ tướng Phạm Minh Chính lăng ‘lơ̆ng dôm nơ̆r tơgop đơ̆ng kơdră chĕp kơ̆l anih mơdro sa kơ Jơnŭm tĕch mơdro Mi - ASEAN; Thủ tướng athei dôm anih tơm, anih jang hơnơ̆ng tơchĕng hơlen, chih iŏk păng đei nơ̆r tơgop tơl nơ̆r, pơm tơdrong hiôk ăn kơ dôm anih mơdro sa.