Tơ̆ jơ bơ̆jang, roi tơbăt hăm Thủ tướng Phạm Minh Chính, Thiếu tướng Phạm Hải Trung Yŏng chĕp kơ̆l khŭl lĭnh vei lăng Pơsat ƀok Hồ, Kơdră khŭl vei lăng Pơsat tơbăt, 6 khei blŭng sơnăm 2024 đơ̆ng Khŭl vei lăng Pơsat hlôi bơ̆jang ‘lơ̆ng tơdrong jang tơgŭm hăm Đảng, teh đak, Thủ tướng teh đak păng Quân ủy Trung ương, Anih tơm vei lăng Khŭl lĭnh găh hơnăp jang vei răk đunh đai, vei lăng sơđơ̆ng ‘lơ̆ng hơkâu ƀok Hồ.

Tang măt Khŭl kơdră teh đak, Thủ tướng pôk pơ ư păng lăng ‘lơ̆ng dôm tơdrong hơdrin, jơhngơ̆m đon jang tơnăp păng jơnei iŏk đei đơ̆ng khŭl grŭp kang ƀô̆, bơngai jang kơ teh đak, khŭl lĭnh păng bơngai jang lơ̆m Khŭl vei lăng Pơsat păng dôm anih jang, rim bơngai jang kiơ̆ hơnăp jang lơ̆m Hơnih gru groa jơhnơr arih - joh ayŏ Ba Đình. Tơ̆ hơnăp kơnh, Thủ tướng athei Khŭl vei lăng Pơsat hơnơ̆ng hơtŏk jơhngơ̆m đon kơchăng, pơcheh hơgei, jang hơdai kơjăp, đei yua hăm dôm anih jang vă jang đang hơgei hloh hơnăp jang đei pơjao hăm đĭ đăng plei nuih, jơhngơ̆m ‘mêm kơ teh đak, jơhngơ̆m chhôk ‘nă hơdrĕch hơdrŭng.