Tơnŏk chơ chuĕn apŭng plĕnh teh Cần Giờ, tơchĕng hơdrol pơm tơ̆ Cù lao Phú Lợi tơ̆ ‘măng đak krong Cái Mép - Thị Vải, apŭng Cần Giờ, akŏp hơgăt hơnih tơnŏk să dang 571 hek tar păng hơgăt măt đak dang 477 hek tar; Akŏp jên tơmơ̆t jang ăn tơdrong jang dang hloh 5 ti USD.  Anih kơ drơ̆m tơmang lăng ƀŭ jih đak dơ sĭ Cần Giờ să 2.870 hek tar, akŏp jên tơmơ̆t jang hloh 217.000 ti hlak jên. Đơ̆ng rŏng kơ hơlen lăng, Thủ tướng Phạm Minh Chính đei jơ bơ̆jang hăm kơdră chĕp kơ̆l dôm Anih tơm, anih jang Trung ương păng pơlei tơm Hồ Chí Minh vă tơlĕch jang hơtŏk tơiung tơring Cần Giờ hrĕnh păng kơjăp.

Thủ tướng Phạm Minh Chính athei pơlei tơm Hồ Chí Minh jăh tơ tĕnh pơjing chĕng hơmet teh hơtŏk tơiung pơlei tơm; tơmơ̆t dơ̆ng, jang pơ keh tơdrong chĕng hơmet teh hơtŏk tơiung apŭng Cần Giờ, tơlĕch lơ̆m akŏp chĕng hơmet teh pơlei tơm. Lơ̆m noh, đei anih kơ drơ̆m ƀŭ jih đak dơ sĭ Cần Giờ păng dôm tơdrong jang nai. Thủ tướng athei chĕng hơmet teh hơtŏk tơiung apŭng Cần Giờ pơma atŭm păng tơring kơdrơ̆m ƀŭ jĭh đak dơ sĭ Cần Giờ pơma hơdrô̆ athei tơklăh, hơmet ming pơ ‘lơ̆ng păng tơgŭm, tơ jur tơdrong tơ hlăk tơ hlĭn trong nơnăm, cham char arih păng hnam oei ăn kon pơlei oei ăn tơring kơdrơ̆m pơlei tơm Hồ Chí Minh.