Kơdră kơ dôm anih jang mŭk drăm lui ngeh hăm tơdrong Tơbôl jang hadoi Việt Nam - Indonesia hơtŏk tơ-iung ‘lơ̆ng rŏ gô jing tơdrong tơm kơjăp vă anih jang mŭk drăm kơ 2 teh đak pơih să jang hadoi; sơkơ̆t hơdah Việt Nam jing tơring kăp gĭt ăn dôm anih jang mŭk drăm asong jang tĕch pơdro păng tĕch răt tơmam drăm ‘lơ̆ng. Tơ̆ hop akŏm, Thủ tướng Phạm Minh Chính hmach bơnê kơ dôm tơdrong asong jang đei jơnei đơ̆ng rim anih jang mŭk drăm tơ̆ Việt Nam. 

Thủ tướng pơkăl, hăm tơdrong pơdui hla bar pơkăp asong jang, pơih să anih jang..., dôm anih jang mŭk drăm kăl jang hadoi kơjăp hăm rim tơring, rim anih jang đei tơrĕk nhen Anih tơm Asong jang vă đei iŏk pơtho, tơgŭm hơdah păng pơm kiơ̆ dôm tơchơ̆t asong jang trŏ ƀlep hăm khôi luơ̆t, kiơ̆ trong hơtŏ hơnơ̆ng kơ dôm anih jang mŭk drăm păng pơm hiôk hla bar pơkăp, tang găn tơdrong tơnap tap hăm anih asong jang.