Hop akŏm Kơdră kơpal năr 4-6/3 jĭ hơyak git kăl lơ̆m chăl sơnăm kơ Australia hăm tơring. Hơyak tơbăt hơdăh pơkăp đơ̆ng Australia lơ̆m atŏk kơtang tơgoăt tơgoăl jang hơdoi lơ̆m tơring Đông Nam Á.

Tơdrong tơm kơ Hop akŏm Gĭt kăl ‘măng mă au ‘noh tơbăt 50 sơnăm jang hơdoi pơma dơnuh Australia - ASEAN. Hop akŏm Kơdră kơpal akŏm lơ̆m 4 tơdrong tơm ‘noh: Mơdro sa, Chĕp pơgơ̆r hle, Tŏ ‘mi kial păng ŭnh hơyuh rơgoh ‘lơ̆ng, păng Jang hơdoi trong đak. Dôm tơdrong jang hơdăh đei: Hop akŏm CEO Hơnih mơdro sa akŏm rim kơdră chĕp pơgơ̆r hơnih mơdro sa kơ Australia păng Đông Nam Á; Hop akŏm rim hơnih mơdro sa păh ai păng iĕ (SME); Hop akŏm găh tŏ ‘mi kiak păng Ŭnh hơyuh rơgoh 'lơ̆ng; Hop akŏm jang hơdoi Trong đak.

‘Măng năm tơmag Australia păng New Zealand đơ̆ng Thủ tướng Phạm Minh Chính păng Hơkăn ƀok hăm rim kơdră tang măt Việt Nam, gô tơgŭm pơjing jơhngơ̆m pran kơtang hloh dơ̆ng ăn tơgoăt tơgoăl hăm Australia păng New Zealand păng vă hơnơ̆ng tơlĕch trong jang tơbôl kăl hloh mă Pơm lêh hop akŏm Đảng ‘măng mă XIII tơlĕch ăn.