Iung pơma tơbăt tơdrong jang ou, Tổng thư ký UNCTAD Rebeca Grynspan pơma tơbăt jơhngơ̆m đon hơ iă hăm tơdrong iŏk đei atŏk tơ iung kơ Việt Nam, iok đei 7% lơm 30 sơnăm ou ki. Tổng Thư ký UNCTAD sơkơ̆t hơdăh tơdrong Hop akŏm UNCTAD 16 đei pơgơ̆r tơ̆ mĭnh teh đak atok tơ iung hơbĕch hơbal gơnơm plôih ‘măng, vang mơ̆t hơdoi jơnei nhen Việt Nam tơbăt hơdăh hơyak pran kơtang lơ̆m jăl ‘nao kơ UNCTAD. Tơ̆ Pơma đam, Thủ tướng Phạm Minh Chính sơkơ̆t hơdăh, rim tơdrong long hrei ou hăm mơdro sa păng atŏk tơ iung đei ƀôh lơ̆m plei teh, pơm kơnê̆ truh rim bơngai kơna kăl vang iung jang pơđĭ kon pơlei, tôm tong păng lơ̆m plei teh kơna rim teh đak kăl atŏk kơtang iung jang hơdoi, iung tơjră tang găn trong dŏng păng pơtrŭt mơdro sa lơ pang ăn atŏk tơ iung. Mă kăl, vă tơjră muh măt hăm rim tơdrong long ‘noh lơ̆m chăl gơ̆h hơgei, Thủ tướng Teh đak akhan, kăl băt hơdăh “Chăl gơ̆h hơgei” mă tôm tong. Pơma hơdăh trong jang đơ̆ng Việt Nam “đĭ pơma ‘noh jang hloi, đĭ pơkăp ‘noh jang kiơ̆”,  Thủ tướng Phạm Minh Chính sơkơ̆t hơdăh Việt Nam lăng kơjăp tơdrong iŏk chĕp pơgơ̆r Hop akŏm UNCTAD 16 vă sơng hơvơn rim bơngai tang măt jơ̆p lơ̆m plei teh.