Tơ̆ Hop akŏm WEF Đại Liên, hăm tơdrong kăl ‘noh nơ̆r pơma gĭt kăl tơ̆ Pơgơ̆r blŭng a, tơ̆ hơnăp dang 1.700 ‘nu tơmoi đơ̆ng 80 teh đak, Thủ tướng Teh đak hlôi tơbăt tơdrong pơm ăn jơhngơ̆m hưch hanh kơtang đơ̆ng Việt Nam găh Tơplih ‘nao, vang mơ̆t hơdoi păng Atŏk tơ iung.

Thủ tướng Teh đák jei pơtruh ăn dôm nơ̆r tơbăt gĭt kăl găh dôm tơdrong jơnei gĭt kăl găh mŭk drăm-tơpôl, găh trong tơlĕch jang, lăng truh trong jang tơm atŏk tơ iung teh đak đơ̆ng Đảng, Teh đak Việt Nam. Lơ̆m ‘măng năm bơ̆ jang, Thủ tướng Phạm Minh Chính đã hlôi đei bơ̆ jang ƀar păh tôch hơ iă, ‘noh pơma đam hăm Tổng Bí thư, Kơdră chĕp pơgơ̆r Teh đak Trung Quốc Tập Cận Bình, Thủ tướng Teh đak Lý Cường, Kơdră chĕp pơgơ̆r Kuô̆k hô̆i Trung Quốc Vương Hộ Ninh; atŭm hăm rim kơdră jang lơ̆m Hơnih tơm Chinh trĭ, Kơ iĕng Thủ tướng Trung Quốc Trương Quốc Thanh vang năm păng iung pơma tơ̆ “Hop akŏm jang hơdoi Việt Nam - Trung Quốc găh atŏk tơ iung trong nơnăm păng hơnăp jang kơ rim hơnih mơdro sa Việt Nam - Trung Quốc.