Hăm teh hơlih tŏk bŏk oei ƀôh hli hlơt tơ̆ lơ tơring, lơ̆m tơdrong năm pơm jang tơ̆ Tơring tơmăn đak krong Cửu Long, kơsơ̆ năr 11/8 Thủ tướng Phạm Minh Chính atŭm hăm khul kơpal pơm jang kơ Jơnŭm pơgơ̆r teh đak păng Ƀĭ thư tĭnh ủy 3 dêh char Cà Mau, Sóc Trăng, Bạc Liêu năm hơlen, sơkơ̆t teh hơlih ah jih đak krong, jih đak dơsĭ tŏk bŏk oei ƀôh hli tơ̆ dôm tơring âu.

Đơ̆ng rŏng kơ chă hơlen, Thủ tướng Phạm Minh Chính păng khul kơpal kơ Jơnŭm pơgơ̆r teh đak đei hop akŏm hăm kơdră kơ 3 dêh char Cà Mau, Sóc Trăng păng Bạc Liêu vă sơkơ̆t hơdah tơdrong đei ƀôh păng hơmet ming teh hơlih tơ̆ jih đak krong đak dơsĭ kơ dôm dêh char âu. Pơma ah jơ bơ̆ jang hăm 3 tơring, Thủ tướng Phạm Minh Chính pơkăl, tơ̆ anăp dôm tơring athei kơchăng tơgŭm sơđơ̆ng tơdrong hơrih ăn dôm unh hnam tơ̆ anih teh hơlih, asong anih oei tơdăng, athei kơchăng yông mă sơđơ̆ng, ưh đei lê̆ răm truh tơdrong hơrih kon pơlei. Thủ tướng pơkăl dôm anih jang tơm, tơring kơchăng băt hơdah, tơlĕch sơnong jang păng pơm kiơ̆ tơdrong đei pơjao dah tom hơmet kiơ̆ tơdrong đei ƀôh, ưh đei pơm hloh tơdrong pơgơ̆r jang kơ po.