Pơma ah jơ Hop akŏm, Thủ tướng teh đak bơ̆n Phạm Minh Chính pơtruh nơ̆r hăm ASEAN păng Ấn Độ pơtoi hơtŏk dôm tơdrong lơ lăi băl gah joh ayŏ, tơpôl, kon bơngai, hơtŏk tơdrong tơbôl 2 pah roi năr roi kơjăp pran kơtang tôm tơdrong. Thủ tướng sơkơ̆t hơdah, kiơ̆ tơdrong le lăi băl vă tơguăt đunh đai, ASEAN hơpơi ‘meh atŭm hăm Ấn Độ, teh đak tơjê̆, bơngai boăl kăp gĭt păng jing teh đak jang hadoi tôm tơdrong, tơgop kăp gĭt ăn tơdrong rơngei sơđơ̆ng, jang hadoi hơtŏk tơ-iung jơnap, kơjăp sơđơ̆ng kơ rim pah, lơ̆m tơring păng lơ̆m apŭng plenh teh.

Ră hơdah tơdrong Jang tơbôl tôm tơdrong ASEAN-Ấn Độ, Thủ tướng pơtruh nơ̆r, 2 pah atŭm pơma đam, jang hadoi păng pơjing đon lui, sek tơlang tơdrong tơgar hăm dôm trong jang rơngei, tơjră hăm dôm tơdrong tơnap tap atŭm, kiơ̆ khôi luơ̆t apŭng plenh teh. Thủ tướng Phạm Minh Chính tơgŭm dôm tơdrong tơlĕch jang hơgei đơ̆ng Ấn Độ nhen Tơdrong jang hadoi gah unh hơyuh jơ̆ng ‘năr, Jang hadoi gah tơmam drăm sinh hŏk, Jang hadoi gah ming man hnam kĕ tơjră hăm ‘mi kial đak hơbông pơrăm, adoi nhen pơtruh nơ̆r hăm teh đak Ấn Độ tơgŭm pơm tơlĕch pơgang hơmet jĭ jăn.