Tơ̆ hop akŏm, tang măt ăn dôm anih jang mŭk drăm kơ 2 teh đak hlôi pơma đam hơ-iă, tơpăt jue păng tơpă đei trong asong jang, lơ̆m noh akŏm gah kŏng ngê̆, tơplih 'nao hơgei; 'meh vă vang jang lơ̆m tơdrong tơplih kơsô̆ kơ Việt Nam.

Hăm đon pơkăp “bơngai pran tơgŭm bơngai kue; bơngai mơlôh tơgŭm bơngai kră; bơngai pơdrŏng, tơgŭm bơngai sa jên khei kơđeh” păng hăm pơkăp “gơ̆t lê̆ tơhĭl sơ̆, hơyak khei năr anô̆ anăp kơnh, pơ-'lơ̆ng jĭ bơnôh đơ̆ng tơblah”, Thủ tướng teh đak 'meh vă kon pơlei, anih jang mŭk drăm Hoa Kỳ truh hăm Việt Nam vă bơ̆ng pang tơdrong tơplih 'nao kơ Việt Nam; sơkơ̆t hơdah Jơnŭm pơgơ̆r teh đak Việt Nam kơchăng pơih 'măng sơng tôm anih jang mŭk drăm truh asong jang trŏ khôi luơ̆t, sơđơ̆ng kơyuơ atŭm pơyua, jơnap kơ rim teh đak, phĭ tơtŏ dơnŏ 'lơ̆ng hiôk hian ăn kon pơlei.