Đơ̆ng rŏng kơ mơ̆ng dôm nơ̆r tơgop pơma đam ah Hop akŏm, Thủ tướng Phạm Minh Chính ăn tơbăt gah tơdrong đei ƀôh păng jang đei jơnei hơdah lơ̆m sơnăm 2023 kơ jâ̆p teh đak, atŭm hăm noh tơbang hơdah dôm tơdrong jang đei jơnei kơ Anih Joh ayŏ Tơplŏng kơdâu păng Tơmang pơhiơ̆, lơ̆m noh ră hơdah Anih Joh ayŏ Tơplŏng kơdâu păng Tơmang pơhiơ̆ hlôi atŭm hăm rim jăl jang, rim anih jang, rim tơring pơtoi tơplih pran gah đon kơchĕng đơ̆ng “jang joh ayŏ” jing  “vei lăng đơ̆ng teh đak gah joh ayŏ”; hơdrin pơklaih tơnap tap, tơhlăk tơhlĭn, iŏk yua trong hiôk vă tơlĕch jang tơnăp dôm sơnong jang, trong jang păng đei iŏk jơnei hơdah.

Gah trong jang, sơnong jang kơ sơnăm 2024 păng khei năr truh Thủ tướng pơkăl Anih Joh ayŏ Tơplŏng kơdâu păng Tơmang pơhiơ̆ pơtoi akŏm jang tơnăp dôm tơchơ̆t jang, khôi luơ̆t đơ̆ng Đảng, Khul Kơpal teh đak gah joh ayŏ, mă kăl noh Sơkơ̆t đơ̆ng ƀok Tổng Bí thư Nguyễn Phú Trọng ah Hop akŏm Joh ayŏ jâ̆p teh đak.