Hơlêm jơhngơ̆m păng thơ thâu têt hăm kŏng nhơ̆n păng bơngai pơm jang tơ̆ Kŏng ti Huyundai Kefico lơ̆m Anih tơm jang Hyundai Hàn Quốc, Thủ tướng Phạm Minh Chính  bơnê kơ tơdrong tơgop đơ̆ng khul jang lơ̆m jơ̆p teh đak tơgop lơ̆m tơdrong đei jơnei hơtŭm kơ teh đak.

Atŭm hăm noh ră hơdah, sơnăm 2023, Hải Dương đei jơnei dôm tơchơ̆t tơlĕch, lơ̆m tơdrong đei jơnei atŭm noh đei tơdrong tơgop đơ̆ng kan ƀô̆, bơngai jang kơ dôm anih jang mŭk drăm lơ̆m dêh char Hải Dương pơma hơtŭm păng Kŏng ti Kefico pơma hơdrô̆, Thủ tướng bơnê kơ Kŏng ti Kefico tơrĕk tơgŭm kŏng nhơ̆n păng hơpơi ‘meh kŏng ti hơtŭm hăm dôm anih jang mŭk drăm vang jang tơgŭm tơpôl, pơm jang trŏ khôi luơ̆t. Thủ tướng pơkăl, Anih jang Đảng, Jơnŭm pơgơ̆r tơring, Măt trâ̆n tôh kuôk, dôm jơnŭm jang chĭnh trĭ dêh char Hải Dương pơtoi jang tơnăp tơdrong pơyua ăn tơpôl, vei lăng cham char, hơtŏk tơdrong hơrih kon pơlei, tơchơ̆t hơtŏk joh ayŏ hơtŏk hăm hơtŏk mŭk drăm – tơpôl.