Tơ̆ ‘măng năm hơpong âu, Thủ tướng Phạm Minh Chính gô đei dôm ‘măng pơma đam, pơma nuh hăm kơdră chĕp kơ̆l teh đak Hungary; năm ngôi tơ̆ 1,2 anih jang mŭk drăm, tơpôl kơ teh đak Hungary; truh hop akŏm anih tĕch mơdro Việt Nam-Hungary; tơƀâp kơdră chĕp kơ̆l 1,2 anih jang tơbôl păng tơƀâp kăn ƀô̆, bơngai jang tơ̆ Anih tang măt păng bơngai dơ̆ng tang ăn tơpôl bơngai Việt Nam tơ̆ Hungary.

‘Măng năm hơpong tơ̆ Hungary đơ̆ng Thủ tướng teh đak gô tơgop pơm hơtŏk hlŏh dơ̆ng đon lui chinh trĭ, hơtŏk, pơm pơ ‘lơ̆ng tơdrong pơvei jang tơbôl đơ̆ng sơ̆, adrin tơgŭm băl đơ̆ng Việt Nam hăm Hungary; atŏk tơiung hơnhăk dôm tơdrong jang hơdoi mât lơ̆m chăl ‘nao, pơm lăp hăm tơdrong ‘mĕh vă jang atŏk tơiung tơ̆ rim teh đak; tưk tơiung tơdrong jang hơdoi găh dôm tơdrong pran ‘lơ̆ng; hơmet kơjăp hlŏh dơ̆ng tơdrong pơvei đơ̆ng kon pơlei Việt Nam hăm kon pơlei Hungary.