Tang măt ăn kơdră chĕp pơgơ̆r Đảng, Teh đak, Thủ tướng hmach ăn rim đe mon hŏk tro gô đei mĭnh pơyan pơdơ̆h kơ hŏk chơt hơ iă, sơđơ̆ng ‘lơ̆ng hơ iă hăm ŭnh hnam păng bôl boăl.

Thủ tướng tơbăt, dôm sơnăm au ki, Đảng, Teh đak bơ̆n ling lang lăng ba kơjăp bơ̆ jang vei lăng năng tông hơ ioh, pơjing rơvơn ‘lơ̆ng hơ iă hloh vă đe hơ ioh tih vơ̆ djơ̆ ‘lơ̆ng, hơrih sa sơđơ̆ng ‘lơ̆ng hơ iă; ưh kơ đei chă jô̆ jăm dih băl păng vei lăng năng tông kơjăp ăn hơ ioh lơ̆m rim tơdrong tơchơ̆t đei ƀơm truh; lăng ‘nau jĭ tơdrong jang kăl hloh. Rim kơdră, rim hơnih jang, rim tơring, rim khul jang tơpôl păng kon pơlei ling lang lăng ba, tơmơ̆t jên jang, vei lăng năng tông ăn bơ̆ jang pơtho pơhrăm, vei lăng năng tông jơhngơ̆m jăn ăn hơ ioh, mă kăl hăm đe hơ ioh dơnuh, đe hơ ioh tơnap tap, đe hơ ioh hơven hơvo jo jăn, đe hơ ioh mơti mơtĕk.