Pơma dơnuh hăm Thủ tướng Phạm Minh Chính, Ƀok soi vei lăng Giuse Nguyễn Văn Phong (Hnam khop Bắc Giang) tơbăt, lơ̆m ƀar sơnăm au ki, lơ̆m dêh char Bắc Giang sơđơ̆ng ‘lơ̆ng hơ ă, kon pơlei pơma atŭm, kon khop pơma hơdrô̆ tôch chơt hơ iă ‘nă hal kơ yuơ tơdrong hơrih sa, jang sa sơđơ̆ng, mă kăl đei sơng Thủ tướng Teh đak năm hmach chơt hơ iă năr Noel sơnăm 2023.

Iung pơma tơ̆ au, Thủ tướng Phạm Minh Chính pơma hơdăh, Đảng, Teh đak hơnơ̆ng yom kiơ̆, lăng kơjăp tơdrong mơ̆ng kơdih lui khop kơ kon pơlei, lơ̆m au đei lui Khop. Thủ tướng pơma hơdăh, Bắc Giang ‘noh dêh char tơƀơ̆p tơnap tap hloh lơ̆m ‘măng jĭ hơbuh Covid-19, mă lei, dêh char hlôi tang găn kĕ, hơmet pơ ‘lơ̆ng păng atŏk tơ iung tĕnh koăng. Jơ ‘năr Noel kơ Tơring khop tôch chơt hơ iă ‘nă hal; hơpơi ‘meh vă tơdrong chĕp pơgơ̆r đơ̆ng Đảng, Teh đak, kon pơlei hơdrin pơm kiơ kơjăp trong bơ̆ jang đơ̆ng Đảng, khôi luơ̆t Teh đak. Thủ tướng Phạm Minh Chính hmach ăn Kon khop Bắc Giang mĭnh pơyan Noel pran jăng grăng akau, hơnŭk hơnoa, mĭnh Sơnăm ‘nao ‘lơ̆ng rŏ hơbŏ nhen.