Hơmet ăn Têt nguyên đán, khei ‘năr  âu ki, Tơring jang mŭk drăm Nghi Sơn păng dôm Tơring jang kơmăy găh sư hlôi hơpăh ăn đe đoàn viên, bơngai jang hlŏh 7.300 tơpu tơmam, akŏm đĭ đăng đei kơjă hlŏh 4,5 ti hlak jên. Pơma tơ̆ âu, Thủ tướng Phạm Minh Chính pơtruh nơ̆r ăn đĭ đăng kăn ƀô, ‘nhŏng ŏh công nhân, bơngai jang, bơngai dơ̆ng tang ăn dôm unh hnam đei kŏng, unh hnam đei tơdrong arih xa pơmat tat nơ̆r ‘mêm kơ eng, jet gia pơma nuh păng pơtruh nơ̆r hmach thơ thou ‘lơ̆ng hlŏh.

Thủ tướng pơma hơdăh, hăm đon tơchĕng năng bơngai ‘nŏh jĭ tơm dơnơm, jĭ tơdrong pơhnŏng vă pơvih ăn, jĭ jơhngâm pran vă jang tŏk. Đảng, teh đak ling lang tơrek truh, vei lăng năng tông vă kon pơlei đei tơdrong arih xa roi phĭ tơtŏ dơnŏ ‘lơ̆ng, hiôk chơt. Thủ tướng hơpơi ‘mĕh dôm bơngai tơnuh, vă jê̆ tơnuh tưk tơiung hlŏh dơ̆ng đon adrin, khŏm jang tŏk kơdih vă gơ̆h klăih đơ̆ng tơnuh hin kơjăp ‘lơ̆ng. ‘Nhŏng oh công nhân, bơngai jang jăh adrin yak hlŏh pơmat tat vă gơ̆h đei tơdrong arih xa hiôk sơđơ̆ng.