Pơgê 20/8, Thủ tướng Phạm Minh Chính hlôi bơ̆jang hăm Khŭl chĕp kơ̆l pơgơ̆r Anih jang Đảng dêh char Kon Tum găh tơdrong hơtŏk tơiung mŭk drăm - tơpôl păng hơmet pơ ‘lơ̆ng dôm nơ̆r apĭnh, athei vă Kon Tum hơtŏk tơiung hrĕnh, kơjăp. Đơ̆ng rŏng mơ̆ng nơ̆r tơgop pơma đơ̆ng kơdră chĕp kơ̆l dôm anih tơm, anih jang, Thủ tướng Phạm Minh Chính pôk pơ ư tơdrong hơdrin păng lăng ‘lơ̆ng jơnei iŏk đei đơ̆ng Đảng bộ, khŭl kơdră, lĭnh păng kon pơlei dêh char Kon Tum, tơgop lơ̆m jơnei atŭm kơ lơ̆m teh đak. Thủ tướng hlôi tơƀôh rơđăh dôm jơnei iŏk đei đơ̆ng dêh char păng dôm tơdrong oei đei, tam mă ‘lơ̆ng kăl kơ hơmet pơ ‘lơ̆ng ming. Tơ̆ hơnăp kơnh Thủ tướng athei, dêh char kăl kơ tơlĕch jang kiơ̆ đei yua Tơdrong tơchơ̆t hop akŏm XIII đơ̆ng Đảng, tơdrong tơchơ̆t kơ sô̆ 23 đơ̆ng Anih tơm Chĭnh trĭ păng tơdrong tơchơ̆t Hop akŏm Đảng bộ dêh char; lơ̆m noh athei bơ̆jang kiơ̆ tơpăt 05 tơdrong kăl pơgơ̆r păng bơ̆jang đơ̆ng Đảng.

Hơtŏk ‘lơ̆ng jơhngơ̆m đon tơgoăt tơgoăl, chă hơdrin kơdih, yak tŏk hăm jơhngơ̆m pran kơdih; ưh kơ răp gô, pơ ‘mơ̆ng, ưh kơ pơdơh tơplih ‘nao pơcheh hơgei, iŏk yua jơnei tơdrong ‘lơ̆ng pha ra, đei yua pơtêng băl, tơdrong hiôk ‘lơ̆ng, sơng đei păng iŏk yua jơnei rim kon jên, tơmam vă hơtŏk tơiung. Kŭm hăm ‘noh Thủ tướng athei, dêh char kăl kơ akŏm hơtŏk tơiung mŭk drăm rơgoh, mŭk drăm kơ sô̆, mŭk drăm ‘lơ̆ng. Pơtrŭt jang hơdai tơring vă pơm hơnih hơtŏk tơiung dang ăi. Tơklep hơnih hơtŏk tơiung mŭk drăm kơ dêh char hăm dôm dêh char tơring tơ ter đak dơ sĭ tŏk bŏk kiơ̆ trong gre 14, 24 păng trong sơlam Việt Nam - Lào - Cam-pu-chia.

Adrol kơ ‘nŏh, lơ̆m ‘măng năm bơ̆ jang tơ̆ dêh char Kon Tum, Thủ tướng Phạm Minh Chính kŭm hăm khul jang truh dăr lăng tơ̆ 1,2 tơring, tơdrong jang mŭk drăm, tơpôl tơ̆ dêh char Kon Tum. Thủ tướng Phạm Minh Chính păng khul jang dăr lăng tơdrong tơprŏh trong jang atŏk tơiung unh điên kial tơ̆ dêh char Kon Tum tơ̆ xăh Tân Lập, apŭng Kon Rẫy. Thủ tướng athei dôm anih tơm, anih jang kơpal păng dêh char Kon Tum hơnơ̆ng hơlen năng, tơchĕng hơlen dơ̆ng tơdrong ‘lơ̆ng; trong tơmât jên jang atŏk tơiung unh điên kial; lăp hăm Tơdrong tơproh trong jang atŭm lơ̆m tơring păng jơ̆p lơ̆m tĕh đak; roi tơbăt mă rơđăh rơđong, trŏ hăm tơdrong hơgăt vă pơm hơtŏk tơdrong đei yoa đơ̆ng jên jang, iŏk yoa tôch ai dôm tơdrong ‘lơ̆ng vă atŏk tơiung unh hơyuh rơgŏh tơ̆ dêh char Kon Tum.

Thủ tướng dăr lăng tơ̆ anih vă pơm cham gre păr Măng Đen; anih vă tơlĕch tơdrong jang pơm trong gre kơdâu hrĕnh Kon Tum - Quảng Ngãi; Trong gre 24 tơƀưh dêh char Kon Tum hăm dêh char Quảng Ngãi; tơring vă sơng iŏk jên jang pơjing tơring kơdrâm, anih pơvih pơvăn, chă tơmang lăng găh tơring Hơlĕch Pơbăh apŭng Kon Plông, dêh char Kon Tum. Đơ̆ng rŏng kơ dăr lăng tơ̆ tơring, mơ̆ng nơ̆r tơroi găh tơdrong vă jang atŏk tơiung anih chă tơmang lăng kơ tĕh đak tơ̆ Măng Đen păng tơdrong pơm trong tơƀưh, Thủ tướng Phạm Minh Chính ăn tơbăt, tơdrong atŏk tơiung Anih chă tơmang lăng kơ tĕh đak tơ̆ Măng Đen lăp hăm trong jang tŏk rơgŏh, kơjăp, jơ̆p lơ̆m dêh char Kon Tum; athei dêh char Kon Tum jang hơdoi hăm dôm Anih tơm, anih jang kơpal bơ̆ jang mă ‘lơ̆ng tơdrong tơproh trong jang vă iŏk yoa đĭ tơdrong pran ‘lơ̆ng păng sek tơlang dôm tơdrong tam mă ‘lơ̆ng hơ iă đơ̆ng Măng Đen; mă loi athei vei mă ‘lơ̆ng, ưh gơ̆h phă lê̆, pơm tơplih cham char ‘lơ̆ng rŏ tơ̆ Măng Đen.

Drơ̆m kơ sơ̆ ‘năr 19/8, năm tơmang tơ̆ Plei Joh ayŏ tơmang lăng Kon Pring tơ̆ thị trấn Măng Đen, Thủ tướng Phạm Minh Chính pơma hơdăh, tơgoăt tơgoăl ‘noh jĭ tơdrong ‘lơ̆ng gĭt kăl, 1 tơdrong tơm tơchơ̆t jơnei đơ̆ng kach mang Việt Nam; hơdai hăm ‘noh jĭ 1 tơdrong joăt joe tôch kơ kăp gĭt đơ̆ng hơdrĕch hơdrŭng bơ̆n, yua thoi noh, kon pơlei athei vei lăng, vei răk păng tơƀăk mong. Thủ tướng athei kon pơlei dôm hơdrĕch hơdrŭng tơgŭm băl pơtrŭt hơtŏk tơiung mŭk drăm, tơpôl; bơ̆jang kiơ̆ trong jang đơ̆ng Đảng, trong jang tơgŭm khôi luơ̆t đơ̆ng teh đak; vei lăng sơđơ̆ng, ‘nĕ kơ mơ̆ng bơngai kơ nê̆ pơ hlŭm pơ hlôm, pơ chuih; chĕp vei tơdrong joh ayŏ hơdrĕch hơdrŭng....

Ƀlep ƀơ̆t hơmet ăn pơgơ̆r mơ̆t hŏk ƀlŭng sơnăm hŏk ‘nao 2023-2024, năm tơmang lăng tơ̆ hnam trưng mầm non Măng Đen tơ̆ thị trấn Măng Đen, apŭng Kon Plông, Thủ tướng Phạm Minh Chính tơƀôh đon ‘meh vă đe kô pơtho athei ling lang băt tơplih ‘nao trong pơtho hŏk, athei hnam trưng hơmet ăn ‘lơ̆ng dôm lăm hŏk. Ƀlep ƀơ̆t ‘măng âu, Thủ tướng pơjao tơpu tơmam đei kơ jă 1 ti hlak jên vă hnam trưng tơmơ̆t jên jang pơm hơmet ming anih jang, tơmam drăm; răt dơ̆ng tơmam yua hŏk pơhrăm, tơmam pơngôi ăn hơioh.