Thủ tướng Phạm Minh Chính pôk pơ ư dêh char Quảng Bình pơma atŭm păng Anih âu pơma hơdrô̆ hlôi jang ‘lơ̆ng trong jang, tơdrong tơgŭm đơ̆ng Đảng, teh đak, ưh đei hŭt lê̆ tơdrong rơgei, hơtŏ ‘lơ̆ng lơ̆m tơpôl, vei sơđơ̆ng tơdrong arih xa tơpôl, cham char vă tơplih iŏk tơdrong jang tŏk mŭk drăm.

Thủ tướng teh đak hơpơi ‘mĕh đe kon mon hơiŏh, dôm bơngai đei tơdrong arih xa pơmat tat tơ̆ âu hơnơ̆ng adrin, khŏm jang, tŏk klăih đơ̆ng pơmat tat; ling lang đei đon tơchĕng ‘lơ̆ng, sơđơ̆ng jơhngâm, huei kơ hrơ mơlou yoa tơdrong jo jăn, adrin pơtâp pơhrăm, pơm hơtŏk jơhngâm pran, hơkâu jăn; atŭm hăm ‘nŏh, pơjing jơhngâm pran, tơiung đon hưch hanh ăn bơngai đei tơdrong arih xa pơmat tat nhen kơdih đei đon jang tŏk lơ̆m tơdrong arih xa.