Pơma tơ̆ âu, Thủ tướng Phạm Minh Chính akhan, lơ̆m tơdrong jơnei atŭm kơ tĕh đak đei lơ tơdrong tơgop gĭt kăl đơ̆ng đe ƀok chuơ pơma atŭm, khul lui chuơ Nam tông Khmer pơma adrô̆. Thủ tướng pơma hơdăh, Đảng, Tĕh đak ling lang adrin yoa tơdrong phĭ tơtŏ dơnŏ ‘lơ̆ng, hiôk chơt kơ kon pơlei pơma atŭm, vei lăng ‘lơ̆ng tơdrong pơm tơm kơ kon bơngai, tơdrong kiơ̆ lui khop mơ̆ng kơvă đơ̆ng kon pơlei; lơ̆m nŏh pơngơ̆t, vei lăng năng tông truh tơ̆ bơngai lui phât Nam Tông Khmer pơma adrô̆.

Tang măt ăn Kơdră chĕp kơ̆l Đảng, tĕh đak, Thủ tướng hơiă hăm đe ƀok chuơ, bơngai lui phât, kon pơlei Khmer ƀlep ƀât Lêh Sen Dolta sơnăm 2023 păng hơpơi ‘mĕh kon pơlei Khmer jang xa đei ƀôh, arih xa hiôk ‘lơ̆ng, tơdrong arih xa roi đunh roi phĭ tơtŏ dơnŏ ‘lơ̆ng, hiôk chơt; Thủ tướng athei Đảng ƀô̆, Khul kơdră pơgơ̆r, Mặt trận Tổ quốc dêh char Trà Vinh vei lăng ‘lơ̆ng hlŏh tơdrong arih xa găh tơmam drăm păng jơhngâm đon ăn kon pơlei.