Đơ̆ng rŏng kơ Drơ̆ng nơ̆r Giơ-ne-vơ (7/1954), teh đak đei tơklăh pơgia, Anih tơm Chĭnh trĭ tơchơ̆t pơjing Khŭl bơ̆jang Khŭl lĭnh gĭt kăl hăm hơnăp jang pơih trong tơgŭm gĭt kăl đơ̆ng tơring găh Tu păng tơring Pơbăh. ‘Năr 19/5/1959 jĭ khei ‘năr gĭt kăl kơ tơdrong pơih trong Trường Sơn - trong Hồ Chí Minh păng đei lăng jĭ Năr joăt joe kơ Ƀô̆ đô̆i Trường Sơn nuih mơng. Vă jang đei tơdrong hơiă Trường Sơn nuih mơng, dôm jĭt rơbăn kang ƀô̆, khŭl lĭnh, hơdruh tơdăm sŭng phŏng, kon pơlei hŭt hơkâu vang iung tơblăh sơ̆ hlôi plang đĭ sơnăm mơ lôh, lơ̆m noh hloh 2 rơbăn kang ƀô̆, khŭl lĭnh, hơdruh tơdăm sŭng phŏng hlôi lôch, vă jê̆ 3 rơbăn lĭnh jĭ rơka, rơbăn ‘nu bơngai đei ƀơm pơgang pơnhŭl da cam.

Iung pơma tơ̆ âu, Thủ tướng Phạm Minh Chính chih iŏk păng tơƀôh jơhngơ̆m băt bơnê kơ dôm tơdrong lôch, plang hơkâu, tơgop tih tên đơ̆ng dôm jơhnơr Ƀô̆ đô̆i Trường Sơn. Thủ tướng tơbăt, đơ̆ng rŏng kơ teh đak rơngei, Ƀô̆ đô̆i  Trường Sơn đei tơplih jing jang hơnăp jang pơjing mŭk drăm, tơklep hơnih rơka tơblăh vang. Binh đoàn 12 đei pơjing kiơ̆ lơ̆m jang pơtăl đơ̆ng khŭl lĭnh Ƀô̆ đô̆i Trường Sơn. Thủ tướng tôch kơ chơt hơiă tơ̆ hơnăp tơdrong hơtŏk tơiung đơ̆ng Binh đoàn 12 - Kŏng ti tơm Ming man Trường Sơn pơđĭ găh ‘lơ̆ng, tơdrong jang tih, pơtôch jang kiơ̆ hơnăp jang chĭnh trĭ; hơnơ̆ng sơkơ̆t hơdăh anih dơ̆ng, bưng ai, hơnăn Trường Sơn, tơgop lơ̆m tơdrong hơtŏk tơiung kơ teh đak.