Sơng iŏk nơ̆r krao hơvơn đơ̆ng Khul kơdră teh đak Dôm tơring Arab jing mĭnh (UAE) păng Khul kơdră teh đak Thổ Nhĩ Kỳ, kơsơ̆ ‘năr 28/11 Thủ tướng Phạm Minh Chính păng hơkăn ƀok, kŭm hăm khul tang măt ăn Việt Nam truh Hop akŏm tih Bơ̆ jang yoa tŏ ‘mi kial lơ̆m Hop akŏm ‘măng mă 28 dôm Pang vang jang kiơ̆ Tơdrong pơkăp đơ̆ng Liên Hợp Quốc găh Tŏ ‘mi kial tơplih (COP28), pơgơ̆r 1,2 tơdrong jang 2 pang tơ̆ UAE păng năm hơpong tơ̆ Thổ Nhĩ Kỳ đơ̆ng ‘năr 29/11 truh ‘năr 03/12/2023.

Hop akŏm tih Bơ̆ jang yoa tŏ ‘mi kial apŭng plenh tĕh pơgơ̆r lơ̆m Hop akŏm COP28 ‘nŏh jĭ tơdrong lơpang gĭt kăl hlŏh lơ̆m sơnăm găh tŏ ‘mi kial tơplih. Hop akŏm tih rŏ năng đei hlŏh 70.000 ‘nu bơngai tang măt truh đơ̆ng 197 teh đak, EU păng rơbâu Khul jang lơ̆m tơpôl, anih tĕch mơdro, khul druh dăm păng dôm pang đei ƀơm truh vang akŏm. Mă loi ‘nŏh tơdrong đei măt đơ̆ng hlŏh 100 ‘nu kơdră chĕp kơ̆l, Thủ tướng dôm teh đak păng kơ dră chĕp kơ̆l lơ anih jang khul grŭp lơ̆m apŭng plenh tĕh. Thủ tướng Phạm Minh Chính vang truh Hop akŏm tih Bơ̆ jang yoa tŏ ‘mi kial ‘nŏh jĭ jơ năr vă Việt Nam tơƀôh hơdăh đon jang tôch tơnăp, tôch kơchăng, vang bơ̆ jang ‘lơ̆ng mưh sek tơlang dôm tơdrong nol atŭm lơ̆m plei teh găh tŏ ‘mi kial tơplih; tơgŭm ăn tơpôl lơ̆m apŭng plenh tĕh băt hơdăh trong jang, đon pơhnŏng păng tơdrong adrin kŭm nhen dôm tơdỏng pơmat tat, pơlong nol đơ̆ng Việt Nam mưh tơjră hăm tŏ ‘mi kial tơplih.