Tơ̆ ‘măng hop akŏm dôm bơngai jang lơ̆m Khŭl kơdră teh đak hlôi mơ̆ng tơroi tơbăt găh Luơ̆t Tơmơ̆t jên jang teh đak (hơmet ming); Tơroi tơbăt găh Luơ̆t hơmet ming, tơmơ̆t dơ̆ng 1,2 hơpăng đơ̆ng Luơ̆t Proh hơmet, Luơ̆t tơmơ̆t jên jang, Luơ̆t chă bơngai iŏk jang; Tơroi tơbăt găh Luơ̆t hơmet ming, tơmơ̆t dơ̆ng 1,2 hơpăng đơ̆ng Luơ̆t jên jang teh đak, Luơ̆t vei lăng, iŏk yua tơmam drăm teh đak, Luơ̆t chih răk kơ teh đak....

Mă loi ‘noh jĭ găh Luơ̆t tơmơ̆t jên jang teh đak (hơmet ming) kiơ̆ kơ Thủ tướng Phạm Minh Chính, tơdrong yan âu athei đei ƀôh đơ̆ng yan âu, pơyom yan âu, iŏk yan âu pơm ‘long rek pơtŏ đei ƀôh ưh kơ ‘lơ̆ng, veh ver tơdrong pơm hơnih glăi ăn kơ đe kang ƀô̆, năm hơdai hăm ‘noh jĭ tơdrong hli kơ hơnăp jang, hli kơ glăi păng ưh kơ jang, đơ̆ng noh brăh brư kon jên, hơtŏk kon jên pơm kiơ̆ ăn kon pơlei, anih mơdro sa. Thủ tướng tơtă, ‘nĕ kơ pơm ăn hơnih apĭnh, asong, athei tơtĕnh băt iŏk yua dôm kon jên lơ̆m păng ‘ngoăih teh đak, kon jên trung ương păng tơring, hơtŏk loi dơ̆ng dăr hơlen lăng, veh ver tơdrong iŏk yua trong jang tơgŭm vă sa pơjĭp, ưh kơ ‘lơ̆ng, pôk hơpăh păng sek phak tơpăt tơtom.