Đơ̆ng sơnăm 2021 truh đĭ sơnăm 2023 lơ̆m teh đak đei 499 tơdrong jang man hnam oei ăn tơpôl đei tơlĕch, hăm 411.250 tŏ hnam. Găh trong tơproh jang, chĕng hơmet teh vă man hnam oei lơ̆m tơpôl, lơ̆m teh đak dang ei chĕng hơmet đei 1.316 tơring teh, xă 8.611 ha vă pơm hnam oei lơ̆m tơpôl, tŏk 5.252 ha pơting hăm sơnăm 2020.

Pơma pơtôch hop akŏm, Thủ tướng Phạm Minh Chính pơma hơdăh, atŏk tơiung hnam oei ăn tơpôl, hnam oei ăn công nhân ‘nŏh jĭ tơdrong gĭt kăl đơ̆ng trong jang atŏk tơiung mŭk drăm, tơpôl. Atŏk tơiung hnam oei, lơ̆m noh đei hnam oei lơ̆m tơpôl ăn bơngai jang đei jê̆n khei tŏ sĕt, công nhân ‘nŏh jĭ hơnăp jang đơ̆ng teh đak, đơ̆ng tơpôl păng đơ̆ng kon pơlei. Thủ tướng athei, Anih tơm vei lăng Công an, Anih tơm vei lăng khul linh teh đak adrin lơ̆m sơnăm 2024, 1 anih tơm man đei 5 rơbâu tŏ hnam oei ăn tơpôl; Tổng Liên đoàn lao động Việt Nam adrin lơ̆m sơnăm 2024 man 2 rơbâu tŏ hnam oei ăn tơpôl.