Pơma tơ̆ hop akŏm, Thủ tướng Phạm Minh Chính pơma hơdăh “3 vang hơdai” ‘nŏh: vang mơ̆ng lăng păng hlôh vao; vang roi tơƀôh trong vă jang, hlôh vao păng yak hơdoi; vang jang, vang xa yoa, vang iŏk jơnei păng jang tŏk. Tơdrong ‘nâu ling lang trŏ mưh tơlĕch hăm dôm anih tĕch mơdro, anih jang hơdoi, kon pơlei. 

Thủ tướng pơma hơdăh, athei hơnơ̆ng hơlen năng, băt hơdăh rim tơdrong lơ̆m apŭng plenh teh păng tơ̆ tơring vă hơmet kơjăp anih tĕch mơdro hlôi đei, pơih xă anih tĕch mơdro ‘nao, hơmet pơ ‘lơ̆ng dôm tơdrong ưh kơmăh, dôm tơdrong mă teh đak nai oei kăl; hơmet pơ ‘lơ̆ng tơdrong găn trong pơtruh tơmam, jang xa hơdoi hăm lơ̆m plei teh kiơ̆ trong pơm hơtŏk, hơmet kơjăp hơnăn tơmam, tơdrong ‘lơ̆ng đơ̆ng tơmam, jang tŏk rơgŏh, jang tŏk hăm kơmăy sô̆; jang hơdoi kơjăp đơ̆ng lơ̆m teh đak păng teh đak đe, jang hơdoi kơplăh dôm anih tơm, anih jang kơpal hăm băl, jang hơdoi đơ̆ng teh đak hăm anih tĕch mơdro, kon pơlei kiơ̆ jơhngâm đon klăih song băl tơdrong đei yoa, vang pŭ hơdai dôm tơdrong pơmat tat.