Tơ̆ hop akŏm, Kơdră vei lăng Anih pơvih ăn Khul kơdră tĕh đak Trần Văn Sơn roi tơbăt tơdrong tơchơ̆t đơ̆ng Thủ tướng tĕh đak găh tơdrong pơjing Khul kơdră pơgơ̆r tơring Đông Nam Bộ. Hăm đon tơchĕng atŏk tơiung tơring Đông Nam Bộ jing tơring jang tŏk hơbĕch hơbal, jing anih tơm jang mŭk drăm, jên hu, tĕch mơdro, pơvih pơvăn, pơtho pơhrăm, atŏk tơiung khul bơngai jang rơgei, khoa hŏk – kơmăy kơ mŏk ‘nao, tơplih ‘nao tơdrong pơchĕh, tơplih hăm kơmăy sô̆ tơm dơnơm kơ tĕh đak păng tơ̆ tơring Đông Nam Á, vei kơjăp hơnăp jang gĭt kăl tơguăt trong jang tŏk hăm dôm tơring jang mŭk drăm nai. Pơjing Đông Nam Bộ jing tơring rơgei, jang hăm kơmăy kơmŏk, mât jang hơdoi ‘lơ̆ng hăm apŭng plenh tĕh.

Tơ̆ hop akŏm, kơdră chĕp kơ̆l dôm Anih tơm, anih jang kơpal, tơring tơrang, dôm bơngai juăt jang khoa hŏk hlôi pơma nuh găh trong vang jang hơdoi păng sơng iŏk jên, tơmam vă man trong gre tơ̆ tơring Đông Nam Bộ kơjăp ‘lơ̆ng. Tơlĕch trong bơ̆ jang pơgơ̆r rim tơdrong jang tơ̆ tơring 6 khei hơtuch sơnăm 2023; tơl tơblang, pơjing păng atŏk tơiung dôm tơring kơdrâm tih tơ̆ tơring jing dôm plt chăl ‘nao ‘lơ̆ng rŏ lơ̆m tơring. Tơlĕch trong jang, tơdrong tơgŭm hơdrô̆ hăm tơring Đông Nam Bộ vă atŏk tơiung trong nơnăm, tơring kơdrâm rơgŏh, anih tơm jang jên hu…