Kiơ̆ tơdrong jang lơ̆m hop akŏm, Khul kơdră tĕh đak hơlen năng, tơgop nơ̆r găh 04 tơdrong athei chih pơjing luơ̆t: Athei chih pơjing Luơ̆t thây kô pơtho; Chih hơmet ming Luơ̆t chih răk; Athei hơmet ming, chih tơmât dơ̆ng 1,2 tơdrong lơ̆m Luơ̆t pơgang Hóa chất; Găh tơdrong chih hơmet ming, tơmât dơ̆ng dôm kơ luơ̆t đei tơdrong hơgăt ƀơm truh tơmât jên jang, jên hu vă hơmet pơ ‘lơ̆ng pơmat tat, tơhlăk tăk ăn dôm tơdrong jang đei jên tơmât jang đơ̆ng tĕh đak.

Pơma tơ̆ hop akŏm, Thủ tướng tĕh đak ăn tơbăt, bơ̆ jang 1 lơ̆m 3 tơdrong gĭt kăl, đơ̆ng sơnăm 2022 truh dang ei, Khul kơdră tĕh đak vei kơjăp, hơnơ̆ng rim khei đei 1 ‘măng hop akŏm găh chih pơjing luơ̆t. Lơ̆m nŏh akŏm jơhngâm hơmet pơ ‘lơ̆ng tơdrong pơmat tat, tơhlăk tăk ƀơm truh trong pơgơ̆r; chih hơdăh hơnăp jang đơ̆ng bơngai chĕp kơ̆l păng ‘măn jên, tơmam vă chih pơjing trong pơgơ̆r, khôi luơ̆t.

‘Măng hop akŏm mă 6, Kuô̆k hô̆i jăl XV lơ̆m khei 10 truh âu kơnh, Khul kơdră tĕh đak vă tơroi ăn Kuô̆k hô̆i set hơlen, pơdrơ̆ng nơ̆r ăn 9 kơ luơ̆t, tơgop nơ̆r ăn 8 kơ luơ̆t, lơ̆m nŏh đei lơ luơ̆t tôch mơmat tat, đei lơ nơ̆r pơma pha ra băl. Yoa thoi nŏh, Thủ tướng athei akŏm jơhngâm, jên, tơmam vă hơmet mă ‘lơ̆ng, chih tơlĕch trŏ khei ‘năr hơgăt, đei yoa ‘lơ̆ng hăm khôi luơ̆t; rim kơ luơ̆t athei hơmet pơ ‘lơ̆ng dôm tơdrong tơhlăk tăk; pơih trong hiôk hian ăn tơdrong jang tŏk.