Pơma tơ̆ hop akŏm, Thủ tướng Phạm Minh Chính tơchĕng ‘lơ̆ng păng pôk pơ ư dôm tơdrong adrin păng tơdrong jang đei đơ̆ng dôm anih jang, mă loi jĭ tơdrong jang tơm đơ̆ng khul linh Công an kon pơlei, tơdrong vang jang kơjăp ‘lơ̆ng đơ̆ng dôm anih tơm, anih jang kơpal, tơring tơrang; tơdrong adrin, vang jang hơdoi đei yoa ‘lơ̆ng đơ̆ng dôm anih jang kơmăy; tơdrong mât 1 ƀơ̆r đon, vang tơgŭm, jang kiơ̆ tôch pơneh đơ̆ng kon pơlei, anih tech mơdro.

Tơ̆ hơnăp kơnh, Thủ tướng pơma hơdăh dôm grŭp jang tơm, lơ̆m nŏh vă tơlĕch jang dôm tơdrong jang kăl đơ̆ng dang ei truh Tết Nguyên đán Giáp Thìn 2024. Kăl loi găh tơlĕch jên vei sơđơ̆ng tơdrong arih xa tơpôl, Thủ tướng athei Kơdră vei lăng kon pơlei 12 tơring jăh tơlĕch trong kla jên tơgŭm vei sơđơ̆ng tơdrong arih xa tơpôl kiơ̆ trong kla lơ̆m the lê̆ pă kla hăm jên măt. Thủ tướng athei, Anih tơm jang Tư pháp jang hơdoi hăm Anih tơm vei lăng Công an tơlĕch trong pơm kơ phĭu lý lịch tư pháp lơ̆m VNeID tơ̆ Thừa Thiên Huế lơ̆m jăl khei mă I/2024 vă pơih xă lơ̆m teh đak.