Pơma tơ̆ hop akŏm, Thủ tướng Phạm Minh Chính pơjao ăn Anih tơm tơlĕch nơ̆r sơkơ̆t, tơmât jên jang vang jang hơdoi hăm Anih jang kơ Khul kơdră teh đak păng dôm anih tơm, tơring tơrang đei ƀơm truh, tơchĕng hơlen, chih akŏm tôm nơ̆r tơgop, vă hơnơ̆ng roi tơƀôh đei yoa ‘lơ̆ng ăn Khul pơgơ̆r jang kơ tơring Đông Nam Bộ lơ̆m tơdrong tơproh hơmet ming tơring tơ̆ hơnăp kơnh.

Găh dôm tơdrong jang atŭm, gĭt kăl, Thủ tướng athei dôm anih tơm, anih jang kơpal, tơring tơrang kiơ̆ hơnăp jang, tơdrong jang chă hơlen năng rim tơdrong pơgăt đơ̆ng dang ei truh đĭ sơnăm 2024 hlôi đei tơlĕch vă sek tơlang pơ ‘lơ̆ng, khŏm jang kĕh, tơgop ‘lơ̆ng ăn tơdrong jang tŏk, vei sơđơ̆ng mŭk drăm lơ̆m teh đak, tang găn kơjă tơmam tŏk hlŏh tơdrong, pơm ‘lơ̆ng ăn rim tơdrong jang tih.