Tơ̆ hop akŏm, dôm bơngai jang lơ̆m Khul hơlen năng tơdrong pơjei, pôk hơpăh păng tơblang hơdăh yoa kiơ, ƀai hŏk gĭt kăl păng tơlĕch dôm tơdrong vă jang, trong jang lơ̆m sơnăm 2024 vă tơplih ‘nao, pơm hơtŏk tơdrong ‘lơ̆ng đơ̆ng tơdrong pơjei, pôk hơpăh; Hơmet pơ ‘lơ̆ng tơdrong hơgăt bơ̆ jang đơ̆ng Khul kiơ̆ trong pơjao hơdăh hơnăp jang, tưk tơiung đon tơnăp đơ̆ng rim bơngai, hơtŏk tơdrong đei yoa đơ̆ng Khul.

Sơnăm 2023, lơ tơdrong pơjei băl đei tơlĕch bơ̆ jang đei yoa, păr ang jơ̆p tơring; Tơdrong pôk pơ ư bơngai jang rơgei păng hơpăh tơmam tôch tơtom, Kơdră teh đak, Thủ tướng teh đak đei hlŏh 1.900 tơdrong tơchơ̆t pôk pơ ư ăn hlŏh 103.600 khul grŭp, lơ bơngai jang rơgei...Pơma tơ̆ hop akŏm. Thủ tướng Phạm Minh Chính akhan, pôk pơ ư athei mă trŏ, mă tơtom păng athei tơrek truh tơdrong hơlen năng, dăr lăng; pơgơ̆r bơ̆ jang dôm tơdrong pơjei băl, tơtom pôk pơ ư, ưh gơ̆h tơlĕch trong vă bơ̆ jang pơtrŏ đĕch, ưh gơ̆h lê̆ đei tơdrong glăi; Hơtŏk tơdrong jang roi tơbăt; tơtom chă ƀôh, hơpăh păng pôk pơ ư dôm bơngai rơgei.