Tang măt Khŭl kơdră teh đak, Thủ tướng Phạm Minh Chính chih iŏk, pôk pơ ư, lăng ‘lơ̆ng dôm jơnei mă dôm anih tơm, anih jang, tơring hlôi hơdrin iŏk đei, mă loi ‘noh jĭ 11 anih tơm, anih jang păng 35 tơring đei kơ sô̆ tơlĕch jên jang hloh kơ sô̆ jô̆ păh lăp kơ lơ̆m teh đak, mă loi ‘noh dôm dêh char tơring Tŏk bŏk, tơgop gĭt kăl lơ̆m hơtŏk tơiung mŭk drăm tơpôl khei ‘năr âu ki.

Thủ tướng pơma hơdăh, sơnăm 2024 athei jing sơnăm jang ‘lơ̆ng lơ̆m tơlĕch jên tơmơ̆t jên jang teh đak, pơm tơdrong ‘lơ̆ng hiôk jang đang dôm tơdrong hơgăt hơtŏk tơiung mŭk drăm tơpôl sơnăm 2024 păng hơdrin truh sơnăm 2025, mă loi ‘noh jĭ 3.000 km trong kơgre kơdâu hrĕnh. Thủ tướng athei dôm Kơdră tơm, Kơdră anih jang, Kơdră Anih vei lăng kon pơlei rim tơring akŏm jang kiơ̆ tơpăt dôm tơdrong Tơchơ̆t đơ̆ng Khŭl kơdră teh đak, Hla ar athei, Hla kăl đơ̆ng Thủ tướng teh đak păng dôm hla ar athei đơ̆ng kơdră chĕp kơ̆l teh đak găh athei tơlĕch, klăih song jên tơmơ̆t jang teh đak sơnăm 2024.