‘Năr 7/7, Thủ tướng Phạm Minh Chính pơgơ̆r jơ bơ̆jang trực tuyến đơ̆ng Khŭl kơdră chĕp kơ̆l teh đak hăm pơlei tơm Hồ Chí Minh tơ lĕch jang Tơdrong tơchơ̆t đơ̆ng Kuôk hô̆i găh pơlong lăng 1,2 trong jang tơgŭm hơdrô̆ hơtŏk tơiung pơlei tơm Hồ Chí Minh. Pơtôch jơ bơ̆jang, Thủ tướng Phạm Minh Chính tơ roi rơđăh, kăl kơ băt hơdăh tơdrong tơlĕch Tơdrong tơchơ̆t ưh khan lăp hơdrô̆ ăn pơlei tơm Hồ Chí Minh, tơdăh tơ pă bơ̆jang jơnei ‘noh lơ̆m đĭ đăng teh đak vang đei sa yua. Thủ tướng athei tơlĕch ăn hloi Trong tơlĕch bơ̆jang đơ̆ng Khŭl kơdră teh đak, hiơ̆ hloh lơ̆m giĕng truh, klăih song rơ đăh rơ đong, pơ jao kơ dôm Phŏ Thủ tướng vei lăng.

Anih tơm tơlĕch nơ̆r sơkơ̆t păng tơmơ̆t jên jang bơ̆jang hơdai hăm Anih jang kơ Khŭl kơdră teh đak păng pơlei tơm Hồ Chí Minh dăr hơlen dơ̆ng, dôm tơdrong kăl kơ Khŭl kơdră teh đak tơlĕch ăn Tơdrong tơchơ̆t ‘noh Khŭl kơdră teh đak tơlĕch jang kiơ̆ tơ rih, pơm hla ar tơ tĕnh, dôm Phŏ Thủ tướng pơgơ̆r kiơ̆ tơdrong jang vei lăng vă hơmet pơ ‘lơ̆ng dôm tơdrong oei đei tơ gop nơ̆r pha ra băl. Dôm anih tơm anih jang tơ tĕnh tơlĕch ăn dôm hla ar pơtho kiơ̆ gơh kĭ ăn. Dôm hla ar athei đei tơlĕch ăn hiơ̆ hloh ‘noh ‘năr 15/8 truh.