Lơ̆m jơ năr hiôk chơt, iung pơma tơ̆ jơ tơƀơ̆p muh măt, Thủ tướng Phạm Minh Chính tơbăt, ‘năr 22/12/2023, vă jê̆ 2 ti kon pơlei lơ̆m apŭng plĕnh teh sơng tơdrong kơtơ̆ng ang ƀơ̆t Khŭl jang hơdai Liên Hợp Quốc hlôi pơdrơ̆ng kiơ̆ tơdrong tơchơ̆t drơ̆ng ăn Têt Nguyên đán ‘noh jĭ năr pơdơh lêh rim sơnăm kơ Liên Hợp Quốc. ‘Nâu jĭ kơtơ̆ng ang chơt hơiă ăn kơ vă jê̆ 2 ti kon pơlei lơ̆m apŭng plĕnh teh. Ƀlep ƀơ̆t ‘măng âu, tang măt kơdră chĕp kơ̆l Đảng, teh đak păng kon pơlei Việt Nam, Thủ tướng bơnê kơ dôm Bơngai tang măt, Kơdră tang măt dôm anih jang apŭng plĕnh teh găh dôm tơdrong ‘mêm tơpă, tơdrong jang hơdai đei yua, tơgŭm kăp gĭt ‘măn ăn kơ Việt Nam lơ̆m sơnăm 2023 păng prăt khei ‘năr âu ki.

Thủ tướng ‘meh vă păng lui ngeh dôm Bơngai tang măt, Kơdră tang măt dôm anih jang apŭng plĕnh teh tơ̆ Việt Nam hơnơ̆ng hơtŏk jơnei hơnăp jang pơm gơng tơƀưh gĭt kăl đơ̆ng kơdih, hơnhăk tơdrong pơvei tơbôl păng jang hơdai đơ̆ng dôm teh đak, dôm anih jang apŭng plĕnh teh hăm Việt Nam roi ‘năr roi tơklep hơdai kơjăp hloh, ‘lơ̆ng, jơnei hloh; yua kơ 1 apŭng plĕnh teh rơngei, tơbôl, jang hơdai păng hơtŏk tơiung kơjăp.