Thủ tướng athei, rim tơring hơdrin lăng tơdrong tơmơ̆t jên jang pơm anih jang kăl tơ̆ tơring ‘noh jĭ tơmơ̆t jên jang ăn hơtŏk tơiung, yua thoi noh athei ‘măn khei ‘năr, jơhngơ̆m jang vă pơgơ̆r; tơƀơ̆p, pơlung dôm bơngai iŏk jang, roi tơƀôh vă jang ‘lơ̆ng. Hăm 1,2 tơdrong jang pơm trong Hơlĕch - Pơmơ̆t tơ̆ 1,2 tơring ‘noh athei hơdrin tơlĕch jang hrĕnh. Găh tơdrong jang Dak Nông – Bình Phước ‘noh athei tơlĕch jang hrĕnh vă Dak Nông klăih đơ̆ng dơnuh hin păng Bình Phước athei pơm pơ drŏng.

Găh 1,2 hơnăp jang tơm tơ̆ hơnăp kơnh, Thủ tướng tơroi rơđăh, kăl kơ jang đang hrôih dôm hla ar trŏ luơ̆t; pơm hơtŏ jên jang; tơtĕnh, lăp, tơdrong kiơ tơhlăk tơhlĭn ‘noh athei Kuôk hô̆i hơmet pơ ‘lơ̆ng; dôm tơring hơmet pơ ‘lơ̆ng pơ tôch tơdrong jang iŏk teh, hơmet pơ ‘lơ̆ng pơtôch dôm tơdrong blĕk kơ đon đơ̆ng kon pơlei. Bí thư anih jang đảng, Kơdră vei lăng kon pơlei athei hơdrin mơ̆t jang. Thủ tướng athei rim tơring kơchăng, hơdrin hloh dơ̆ng lơ̆m tơdrong jang ‘nâu, pơm hơnih hơtŏk tơiung ‘nao, kŭm hăm ‘noh jĭ jang ‘lơ̆ng tơdrong jang chĕng hơmet teh; tơroi tơdrong proh hơmet ‘nao găh teh păng dôm tơdrong nai hai.